Yllir – klippingar fyrir veturinn
05.11.2010 
2 Comments
Spurning:
Sæll,
Í mínum garði er stór yllir og hann vill brotna mikið á hverjum vetri undan snjóþynglsum. Er ráðlegt að klippa hann núna fyrir veturinn, til að koma í veg fyrir ljót brot og að börkur rifni, eða er betra að bíða fram á vorið og klippa þá þær greinar sem þegar hafa brotnað?
Með góðri kveðju – Jóhanna
Svar:
Sæl Jóhanna,
Yllir vex gjarnan mikið og myndar langar greinar hvert sumar. Því meiri skugga sem hann er í því lengri og viðkvæmari greinar! Þú segir að hann brotni mikið á hverjum vetri og því ráðlegg ég þér að klippa hann fyrir veturinn. Framvegis ættirðu að beita annarri aðferð sem felur í sér að klippa oftar um sumarið. Þannig greinir runninn sig meira og verður þ.a.l. sterkari gagnvart snjóþyngslum og öðru álagi auk þess sem hann verður þéttari og fallegri. Ef aðeins er klippt að vori (og svo kannski snemma vetrar) tapast mikil orka með löngu greinunum, sem við þurfum svo að fjarlægja. Ég mæli með að þú styttir greinar núna þannig að 15-20 cm verði eftir að árssprotanum, klippir svo næst í júní þegar aðrir 15-20 cm hafa bæst við og á sama hátt í júlí og ágúst. Þar með ættirðu að ná runnanum þannig að ekki þurfi að klippa sérstaklega fyrir veturinn. Athugaðu að sentimetramálin sem ég nefni eru ekki heilagar tölur heldur aðeins viðmiðandi.
Vona að þetta hjálpi þér eitthvað í baráttunni,
með bestu kveðju – Baldur Gunnlaugsson,
En með þessari aðferð þá fjarlægir þú öll blóm og ber!
Það er rétt ályktað en engu að síður aðferð sem ég beiti ef yllirinn er í miklum skugga. Hann hentar nefnilega mjög vel og er oft ,,græn” planta í skugga. Ég tók því þannig að plantan væri í slíkum aðstæðum Ljóst er alla vega að viðkomandi þarf og hefur klippt runnann mikið þar sem hann brotnar alltaf mikið.
Ef runninn er á sólríkum stað og ræktaður vegna blóma og berja þá má stytta greinar eftir berjatíð. Yfirleitt tekur við mikill lengdarvöxtur í greinum að því loknu og hann vex ansi langt inn í haustið.