Concrete concepts – kynning hjá BM Vallá

Concrete concepts – kynning hjá BM Vallá

Miðvikudaginn 3. nóvember s.l. var haldin kynning hjá BM Vallá. Á kynningunni fjallaði Stephan H. Steffen framkvæmdastjóri SF-Kooperation í Þýskalandi um ýmsar rannsóknir og nýjungar á steyptum hellum og undirlagi/burðarlagi hellna. Margir kannast við svo kallaða S-steina sem mikið hafa verið notaðir á svæðum þar sem álag er mikið. S-steinar hafa verið framleiddir frá 1955.

Stephan undraðist mjög hversu fáar götur eru hellulagðar í Reykjavík, t.d. í miðbænum. Í því sambandi má nefna að hlutfall hellulagna er mun hærra en malbiks í Þýskalandi enda hafi hellur mun meiri styrk og lengri endingartíma.

Fjallað var um gegndræpar hellulagnir sem hleypa háu hlutfalli yfirborðsvatns í gegnum sig. Gerðar eru miklar kröfur um sjálfbærar ofanvatnslausnir í flestum löndum vestur-Evrópu (e. Rainwater management).

Stephan fjallaði um ýmsar þróanir í hellulögnum, m.a. hellur með sjálfhreinsandi yfirborði, hellur með hitavörn, hellur sem mosi vex ekki á og hellur sem eru sérstaklega hugsaðar fyrir slétt yfirborð t.d. þar sem fatlaðir þurfa að komast um.

Aðal umfjöllunarefnið var nýtt efni, svo kallað “Ecoprec” sem notað er undir hellulagnir og eykur styrk og endingu burðarlagsins verulega. Sjá nánar um Ecoprec hér.

Ágæt mæting var á kynninguna, og voru fulltrúar meða annars frá félagi Skrúðgarðyrkjumeistara, Hortium menntafélagi, FÍLA, SAMGUS, Vegagerðinni o.fl.

Stjórnendur BM Vallár eiga hrós skilið fyrir gott framtak.