Notaðu veturinn til að skipuleggja draumagarðinn!

Um veturinn, þegar veður er kalt og ekki margt um að vera í garðinum, er tilvalið að skipuleggja framkvæmdir og leggja á ráðin um breytingar til móts við hinn „fullkomna garð“.

En hvernig skipuleggur maður draumagarðinn?

Góð ráð um skipulag:

Skiptu garðinum í svæði með tilliti til notkunar, t.d. grillsvæði, matjurtasvæði, leiksvæði, sólbaðssvæði, jarðgerarsvæði, o.s.frv. Þetta gefur betri nýtingu og gerir verkefnin í garðinum einfaldari, þar sem maður getur tekið eitt svæði fyrir í einu.

Notaðu lágvaxtin limgerði, runna, gróðurbeð eða girðingar til að skipta garðinum upp í svæði og skapa ólík rými.

Veldu fáar efnistegundir og liti, einfalt er yfirleitt best.

Notaðu þekjuplöntur, svo sem hnoðra (Sedum spp.) í gróðurbeðin, það auðveldar baráttuna við illgresið.

Forðastu að nota möl eða sand sem þekjulag í beðum, mölin getur sært börk trjánna og stöngla blómplantna. Einnig mun illgresið skjóta upp kollinum fyrr eða síðar.

Plantaðu fjölærum kryddjurtum í garðinn, t.d. myntu, salvíu, graslauk og oregano. Prófaðu einnig að rækta kryddjurtir í pottum og kerjum, rósmarín og aðrar tegundir sem þola ekki frost er t.d. gott að rækta í pottum og færa inn yfir veturinn.

Ræktaðu þínar eigin matjurtir, þar er auðveldara en þú heldur. Eikarlauf, spínat, blaðsalat, sellerí, hnúðkál, rabarbari, rauðrófur, kartöflur eru dæmi um tegundir sem auðvelt er að rækta, ræðst fyrst og fremst af því plássi sem til staðar er.

Notaðu plöntur sem eru blómríkar og blómstra á ólíkum tímum, reyndu að hafa eitthvað til að njóta allt árið um kring, t.d. sígrænar plöntur, berjaplöntur, ilmandi plöntur, blaðfagrar plönur, plöntur sem laða að sér fugla o.s.frv.

Reyndu að áætla endanlega stærð þeirra trjáa og runna sem þú plantar, m.t.t. þess rýmis sem til staðar er. Hávaxnar tegundir, s.s. aspir, greni, lerki o.fl. eiga yfirleitt ekki heima í venjulegum heimilisgörðum, munu fyrr eða síðar takmarka notkunarmöguleika garðsins, kasta skugga á svæði og mögulega valda nágrannaerjum.

Leitaðu ráða hjá sérfræðingum, m.a. skrúðgarðyrkjumeistara, landslagarkítekt og garðlöntufræðingi.

Landslagsarkítektar hafa faglega þekkingu varðandi skipulag og uppbyggingu garðsins, þeir veita ráðgjöf um réttar plöntutegundir með tilliti lífræðilegra þarfa, rýmis og vaxtargetu. Þeir leiðbeina um efnisval, m.a. hvaða yfirborðsefni henta hverju sinni, hellur, timbur, gras o.s.frv.

Skrúðgarðyrkjumeistarar hafa faglega þekkingu varðandi framkvæmd verka í samræmi við hönnun, m.a. útplöntun, þökulagnir, grassáningu, steinhleðslur, hellulagnir, pallasmíði o.fl. Skrúðgarðyrkjumeistarar eru sérfræðingar í yfirborðsfrágangi, bæði hörðum yfirborðsefnum og lifandi yfirborðsefnum. Þeir þekkja lífræðilegar þarfir gróðurtegunda, jarðvegsgerðir, nauðsynlegan áburð og umhirðu, t.d. grasslátt, trjáklippingar o.fl. Sjá nánar um skrúðgarðyrkjumeistara hér.

Garðplöntufræðingar eru sérfræðingar í trjá- og runnategundum, fjölæringum og sumarblómum. Þeir veita ráðgjöf um hvaða plöntur henta þér m.t.t. þeirra aðstæðna sem til staðar eru í þínum garði. Stærðir, þéttleiki, rýmisþörf, skuggaþol, áburðarþörf o.fl. eru dæmi um upplýsingar sem garðplöntuframleiðendur veita.