Eitrun á sitkalús

Spurning:

Sælir

Ég er með eina fyrirspurn: Til mín kom verktaki og vildi eitra hjá mér garðinn gegn sitkalús. Hann tjáði mér að nú væri rétti tíminn til að eitra gegn þessum “mikla skaðvaldi”. Ég er með nokkur grenitré og furur í mínum garði en hef aldrei orðið fyrir áföllum vegna sitkalúsarinnar. Fékk þær upplýsingar hjá þessum “sérfræðingi” að lýs sem leggjast á sígræn tré séu hvað verstar á þessum árstíma, best sé að eitra núna strax og svo aftur eftir áramótin, í febrúar – mars. Til viðbótar þessu má svo gera ráð fyrir að eitra þurfi önnur tré í maí gegn maðki og aftur í júní gegn blaðlús.

Persónulega þykir mér þetta helst til mikið eiturbras og langar að heyra hvort þið hafið skoðun á þessum málum.

Með kveðju / Heimir

Svar:

Sæll Heimir

Hér eru nokkur atriði sem hjálpa þér vonandi í baráttunni:

Sitkalús – Nokkur atriði varðandi tjón og varnir

1. Sitkalús veldur fyrst og fremst tjóni á sitka-, rauð- og blágreni, ekki þarf að hafa áhyggjur af öðrum tegundum barrtrjáa.
2. Sitkalúsin situr á nálum trjánna og sprautar í þeir eitri þannig að þær verða gular, síðar rauðbrúnar og detta loks af. Hún byrjar að vinna innanfrá þannig að það eru nálarnar sem eru næst stofninum sem drepast fyrst. Athugið með stækkunargleri hvort lús sé til staðar, það er engin ástæða til að aðhafast ef ekkert finnst.
3. Ef athugun leiðir í ljós að lús sé til staðar getur verið ástæða til þess að úða gegn henni með skordýraeitri.
4. Ástæða er til að úða stök tré eða fáein tré sem standa saman, en yfirleitt er of kostnaðarsamt að ráðast gegn sitkalús á þennan hátt ef er að ræða heila grenilundi.
5. Algengustu skordýraeyðarnir gegn sitkalús eru Permasect C eða Decis. Úða skal  í þurru, skýjuðu og stilltu veðri. Best er að hitinn sé um eða yfir 10°C og hann má alls ekki vera undir 5°C, því þá virka efnin lítið sem ekkert.
6. Stofn sitkalúsar nær yfirleitt hámarki tvisvar á ári, í maí og október. Mikilvægt er að koma í veg fyrir að stofninn nái þessum toppum og samkvæmt því rétt, að úða trén á tímabilinu mars-maí að vori og september-október að hausti. Reyndar er sitkalúsin á ferli allt árið og því hægt að úða gegn henni hvenær sem er, sé talin hætta á tjóni og aðstæður til úðunar í lagi.
7. Yfirleitt drepast trén ekki af lúsinni og þau ná sér oftast nær alveg á 3-5 árum ef ekki kemur til nýr faraldur. Það er því ástæðulaust að fella tré fyrr en útséð er um hvernig þeim reiðir af.

Sjá einnig fróðleik um sitkalús á meðfylgjandi slóð: Skógur

Bestu kveðjur, Björn Gunnlaugsson