Uppskera úr garðinum

Allt sem við ræktum í garðinum á það semeiginlegt að smakkast best þegar það er nýtt og ferskt. Þar af leiðandi er upplagt að nýta sem mest af hráefninu á uppskerutíma en ef maður er svo afkastamikill ræktandi að eiga afgang má nota ýmsar aðferðir við að varðveita hráefnið til seinni tíma. Ýmiskonar sultur, mauk, söft, djúsar, sjeikar, niðursuður, frysting og þurrkun er meðal þess sem nýta má við varðveislu og framlengingu á líftíma afurða úr garðinum.

Þurrkun

Flestar kryddplöntur er auðvelt að þurrka og nýta þurrar í matreiðslu. Einnig má blanda saman tegundum eftir þurrkun og gera kryddblöndur heimilisins. Best er að þurrka kryddplöntur í þar til gerðum þurrkofnum þar sem plönturnar eru lagðar í grindur og volgt loft leikur um þær. Einnig er hægt að þurrka kryddplöntur í venjulegum ofni með blæstri en mikilvægt er að hafa ofninn opinn við þurrkunina og gæta þess að hann verði ekki of heitur því við það skemmast plönturnar. Gamalt ráð er að festa saman kryddplöntur í knippi og hengja þær upp á þurrum og heitum stað í um það bil eina viku eða þar til blöðin molna við snertingu.

Að lokinni þurrkun er best að mylja plönturnar niður og koma fyrir í loftþéttri krukku.

Sjá nánar í bókinni Gómsætt úr garðinum