Horticum menntafélag ehf.

Horticum menntafélag ehf. starfar að miðlun fræðsluefnis á sviði umhverfis- og garðyrkju. Sérfræðingar menntafélagsins hafa víðtæka reynslu og menntun á þessu sviði og hafa allir komið að kennslu og gerð kennsluefnis, á framhalds og háskólastigi, bæði við Garðyrkjuskóla ríkisins og Landbúnaðarháskóla Íslands.  Einnig hefur Horticum menntafélag staðið fyrir ýmiskonar námskeiðum, bæði fyrir fagaðila og áhugamenn, m.a. í umhirðu grænna svæða, jarðgerð o.fl.. Námskeiðin eru m.a. haldin í samstarfi við Endurmenntun Háskóla Íslands, Landbúnaðarháskóla Íslands og Mími-Símenntun.

Námskeið fyrir sumarstarfsmenn

Undanfarnar vikur hefur Horticum menntafélag haldið námskeið fyrir starfsmenn sem sinna daglegri umhirðu grænna svæða. Áherlsuatriði námskeiðanna eru fagleg vinnubrögð, meðferð véla og verkfæra auk almennra öryggisatriða og líkamsbeitingar. Nokkur námskeiðanna voru haldin í samstarfi við Heilsuvernd þar sem sérfræðingar í réttri líkamsbetingu og starfsöryggi héldu fyrirlestur. Garðyrkjudeildir Reykjavíkurborgar, Garðabæjar, Kópavogs og Faxaflóahafna eru meðal þeirra sem fengu Horticum til að leiðbeina starfsmönnum.                                                                                 Á myndinni sjást Erla Bil Bjarnardóttir Garðyrkjustjóri Garðabæjar og Baldur Gunnlaugsson frá Horticum menntafélagi á flokkstjóranámskeiði í Garðabæ.

Horticum menntafélag og Félag skrúðgarðyrkjumeistara miðla fróðleik

Nýverið gerði Horticum menntafélag samkomulag við Fréttablaðið varðandi pistlaskrif um garðyrkju og umhverfistengd málefni. Gert er ráð fyrir að pistlarnir verði birtir í sérblaðinu “Hýbýli og viðhald” enda megin viðfangsefnið viðhald og uppbygging grænna svæða. Lesendum mun í kjölfarið gefast kostur á að sækja ýmsan fróðleik varðandi garðyrkju- og umhverfistengd málefni á heimasíðuna www.meistari.is Sjá nánar um grein fréttablaðsins hér.

Vinnan í garðinum – handbók um garðverkin

Sala bókarinnar “Vinnan í garðinum”, sem gefin er út í samstarfi við Blómaval, fer vel af stað. Nú þegar eru rúmlega 1000 eintök seld. Höfundar bókarinnar, þeir Baldur Gunnlaugsson, Magnús Bjarklind, Björn Gunnlaugsson og Sveinn Aðalsteinsson hafa komið að kynningum í verlsunum Blómavals. Almennt eru garðeigendur mjög ánægðir með framsetningu efnis í bókinni, sem er ríkulega myndskreytt og textar settir fram á einfaldan og aðgengilegan hátt. Á myndinni hér að ofan sjást þeir Baldur Gunnlaugsson og Björn Gunnlaugsson á spjalli við áhugasama garðeigendur í Blómaval.

Garðverkin – handbók um vinnuna í garðinum

Bókin er skrifuð með það í huga að lesandinn hafi ekki áralanga reynslu eða menntun í garðyrkju en hafi áhuga á að reyna sig við garðverkin og njóta til þess leiðsagnar fagmanna. Bókin hefst á því sem flestir nýbakaðir garðeigendur byrja á að fást við þ.e. á grasflötinni og umhirðu hennar. Eftir því sem líður á texta koma frekari lýsingar á fjölbreyttari garðverkum t.d. gróðursetning og umhirða sumarblóma, fjölæringa, trjáa og runna. Markmið höfunda er að kynna sem flest garðverk á auðskiljanlegan hátt en síðan geta áhugasamir leitað sér frekari fróðleiks á námskeiðum eða tileinkað sér fróðleik á netinu. Verkunum í garðinum lýkur aldrei hjá áhugasömum eiganda eða notanda og sífellt er hægt að bæta við tegundum til skrauts eða nytja.

Við sem að þessari bók stöndum höfum allir áralanga menntun og reynslu við byggingu og umhirðu garða og jafnframt stundað kennslu í garðyrkjuskólum, bæði á Íslandi og erlendis. Það var markmið okkar hafa myndefnið ríkulegt og leiðbeiningar skýrar og einfaldar. Höfundar texta eru, þeir Magnús Bjarklind, Baldur Gunnlaugsson, Björn Gunnlaugsson og Sveinn Aðalsteinsson.

Bókin er seld í verslunum Blómvals / Húsasmiðjunnar og kostar aðeins 1.490 kr. sjá nánar hér

Garðyrkjunámskeið í samstarfi við Endurmenntun HÍ.

Matjurtir (22. og 24. maí)

Garðverkin (dagsetning liggur ekki fyrir)

Staðbundin jarðgerð (8. apríl)

Trjárækt á sumarhúsalóðum (19. apríl)

Kryddjurtir (27. apríl)

Rósarækt (4. og 6. maí)

Safnhaugagerð. (17. og 18. maí)

Sjá nánar á vef endurmenntunar: www.endurmenntun.is

Fagleg umhirða trjágróðurs (19. mars 2010)

Námskeiði í faglegri umhirðu trjágróðurs lauk í gær. Góð þátttaka var á námskeiðinu og voru nemendur m.a. frá Orkuveitu Reykjavíkur, Landsvirkjun, Kirkjugörðum Reykjavíkurprófastdæma, Reykjavíkurborg, Sorpu o.fl. Þátttakendur voru ángægðir með uppbyggingu og innihald námskeiðsins og ekki spillti afar sólríkt og gott veður fyrir. Kennslan fór fram í Ræktunarstöðinni í Fossvogi þar sem aðstaðan er afar góð, bæði til verklegrar útikennslu og fyrirlestra innandyra.

Nordland2011 – Fundur í Finnlandi

Helgina 4-7 mars, s.l. var þriðji fundur í verkefninu “Nordland2011”. Þátttakendur frá 4 löndum sóttu fundinn sem haldinn var í Tampere í Finnlandi. Þátttökulöndin eru í dag: Ísland, Finnland, Danmörk og Noregur. Fulltrúar landanna koma ýmist frá menntastofnunum eða landsfélögum skrúðgarðyrkjumeistara. Umræðuefni fundarins var:

1. Samanburður á stuttum námskeiðum í steinlögnum og umhirðutækni (Ísland, Danmörk, Finnland)
2. Kynning á norsku kennsluefni sem stendur til að gefa út á næstu dögum.
3. Kynning á íslensku kennsluefni og mögulegu samnorrænni útgáfu kennsluefnis.
4. Umfjöllun um færnimarkmið viðkomandi námsskráa og áherslur í viðkomandi löndum.
5. Einnig var kynnt ný verknámsaðastaða hjá VERTE í Tampere.

Fundurinn þótti afar vel heppnaðaður og gagnlegur og verða niðurstöður afar gagnlegar í áframhaldandi vinnu við verknámskennslu. Finnland hefur m.a. sett sér það markmið að hefja nám í steinlögnum í samræmi við sameiginlega niðurstöðu landanna varðandi færnimarkmið og einstaka námsáfanga.

Jarðlagnatækni – kennsla í yfirborðsfrágangi

Horticum menntafélag og Félag skrúðgarðyrkjumeistara hafa undanfarna daga kennt nemendum  í jarðlagnatækni hjá Mími-símenntun um hellulagnir og yfirborðsfrágang. Bókleg kennsla fór fram í húsakynnum Mímis í Skeifunni en verkleg kennsla var í Skerjarfirði. Fjallað var um jarðveg, uppbyggingu burðarlags, þjöppun og yfirborðsfrágang. Sérstök áhersla var lögð á hellulagnir og unnu nemendur verkefni sem byggir á bóklega hlutanum. Á myndinni hér til hliðar sjást nemendur fá tilsögn í oddsteinalögn hjá Þorkatli Gunnarssyni.

Project Nordland2011 (21.-23. janúar 2010)

Annar fundur í samstarfsverkefni á norðurlöndum var haldinn í Danmörku, nánar tiltekið í húsakynnum Jordbrugets uddannelsescenter (JU) í Beder. Umræðuefni fundarins voru m.a. samanburður á námsskrám verkánms á sviði skrúðgarðyrkju í Finnlandi, Danmörku og á Íslandi. Einnig var fjallað um hugmyndir og kosti European qualification framework (EQF)  auk viðræðna um gerð kennsluefnis á viðkomandi fagsviði. Fundurinn var afar vel heppnaður að mati þátttakanda og mikilvægur varðandi framvindu verkefnisins.

Út er komin handbókin „Knattspyrnuvellir – umhirða og viðhald“.

Handbókin er unnin af verkfræðistofunni Eflu í samvinnu    við Íþrótta og tómstundasvið Reykjavíkur. Markmiðið með handbókinni er að miðla fræðslu til rekstraraðila knattspyrnu­valla og leiðbeina um helstu viðhaldsverkefni sem framkvæmd eru á völlunum. Einnig að leiðbeina um undirbúning og uppbyggingu knattspyrnuvalla, t.d. fyllingarefni og vaxtarlag, æskilegar kornarkúrfur m.t.t. lífræðilegra þarfa grassins o.fl.

Útgáfa bókarinnar er liður í þeirri þjónustu og ráðgjöf sem Verkfræðistofan Efla veitir á sviði viðhalds- og umhirðu grasvalla. Höfundar texta eru sérfræðingar Eflu í uppbyggingu og viðhaldi grasvalla, þeir Magnús Bjarklind garðyrkjutæknir, Árni Bragason jurtaerfðafræðingur og Jón Haukur Steingrímsson jarðverkfræðingur. Stuðst er við áður útgefna handbók Eflu, „Almennar leiðbeiningar um helstu umhirðu- og viðhaldsverkefni á golfvöllum“, sem unnin var í samstarfi við Golfsamband Íslands og Samtök íþrótta- og golfvallastarfsmanna á Íslandi.

Athugið að handbókin er vistuð og aðgengileg öllum á heimasíðu Eflu www.efla.is.  Bókin er unnin m.t.t. notkunar á netinu þar er að finna ýmsar aukaupplýsingar og tengingar við faglegt ítarefni.

Námskeið vormisseris 2010 – Endurmenntun Háskóla Íslands

Horticum menntafélag og Endurmenntun Háskóla Íslands standa fyrir ýmsum spennandi námskeiðum á sviði garðyrkju og umhverfis og hafa námskeið vormisseris 2010 nýlega verið kynnt á vef Endurmenntunar www.ehi.is . Sem dæmi má nefna: námskeið í safnhaugagerð, rósarækt, krydd– og matjurtarækt, trjárækt á sumarhúsalóðum auk námskeiðs um helstu umhirðu- og viðhaldsverkefni garðeigandans. Einnig má nefna námskeiðið “Gróður og grafir í Hólavallagarði” þar sem Heimir Janusarson, garðyrkjufræðingur og Sólveig Ólafsdóttir sagnfræðingur fræða um sögu garðsins.  Nokkur námskeiðana eru haldin í samstarfi við Blómaval og Húsasmiðjuna og mun þátttakendum bjóðast kynningar og afsláttur á ýmsum garðyrkjuvörum og verkfærum sem tengjast þema viðkomandi námskeiðs.  Lesa má nánar um námskeiðin undir flipanum “Námskeið og kennsla”.

Leiðbeiningar – almenn garðyrkjustörf

Horticum menntafélag hefur skrifað ýmsa fræðslutexta / leiðbeininga um almenn garðyrkjustörf. Meðal annars eru leiðbeiningar fyrir hinn almenna garðeiganda sem ekki hefur faglegann bakgrunn, þ.e. leiðbeiningar á mannamáli. Textarnir henta mjög vel fyrir sveitarfélög, fyrirtæki og stofnanir sem vilja koma vönduðum og faglegum upplýsingum á framfæri, t.d. til starfsmanna eða almennings. Nú þegar hafa nokkrir aðilar birt texta fré menntafélaginu á heimsíðum sínum, m.a. www.gardabaer.is

Hér má sjá dæmi um leiðbeiningu sem fjallar um jarðgerð. Áhugasamir geta haft samband við Magnús í síma: 822 0469 eða sent póst á: magnus@horticum.is

Haustfundur SAMGUS (29. október 2009)

Haustfundur SAMGUS, Samtök Garðyrkju- og Umhverfisstjóra Sveitarfélaga, var haldinn í Garðabæ, fimmtudaginn 29. október s.l. Á fundinum kynnti Þorkell Gunnarsson, formaður félags Skrúðgarðyrkjumeistara, nýja námsbraut við Tækniskólann í steinlagna- og umhirðutækni. Einnig kynnti Guðríður Helgadóttir drög að nýrri námsskrá LBHÍ vegna garðyrkjugreina.

Steinlagnatækni – Skráning stendur yfir

Nú standa yfir skráningar vegna steinlagnatækni fyrir haustönn 2009. Í náminu er fjallað um almennan yfirborðsfrágang með áherslu á hellulagnir, forsteypta kanta og hleðslur. Kennd verða grunnatriði landmælinga, lestur teikninga og verklýsinga o.fl. Einnig er fjallað um uppbyggingu burðarlags, m.t.t. breytilegs álags. Kennarar eru m.a. frá félagi Skrúðgarðyrkjumeistara og hafa mikla faglega reynslu og þekkingu. Lögð verður áhersla á verklega kennslu sem fer fram í húsakynnum Tækniskólanns í Skerjafirði.

1-4. október 2009

Samnorrænt verkefni í námsskrár- og námsefnisgerð á sviði skrúðgarðyrkju

Laugardaginn 2. október s.l. var verkefnið Nordland2011 formlega sett á laggirnar. Verkefnisstjórn er í höndum Horticum menntafélags ehf. en þátttaendur í verkefninu eru: Félag skrúðgarðyrkjumeistara á Íslandi og Finnlandi, Jordbrugets uddannelsescenter Aarhus og Verte í Finnlandi. Verkefnið felur m.a. í sér námsskrárgerð og námsefnisgerð á sviði skrúðgarðyrkju á norðurlöndunum.

17. september 2009

Steinlagnatækni – kennsla hefst 26. október 2009

Þessa dagana standa yfir skráningar í nýtt starfsmenntanám, steinlagnatækni, fyrir haustönn 2009. Kennslan hefst mánudaginn 26. október kl.17:10. Námið, sem er á sviði skrúðgarðyrkju, er mótað og uppbyggt af félagi skrúðgarðyrkjumeistara og Horticum menntafélagi ehf. í samstarfi við Tækniskólann.

Námið er hugsað fyrir starfsmenn sem vinna við ýmsan yfirborðsfrágang m.a. hellu- og steinlagnir. Kennslan fer fram í Skerjafirði, í húsnæði Tækniskólans, þar sem aðstaða til verk- og bóknáms er mjög góð. Sambærilegt nám hefur lengi verið í boði á hinum norðurlöndunum en býðst nú í fyrsta sinn á Íslandi. Boðið verður uppp á tvær námslotur í steinlagnatækni en hvor um sig er 125 kennslustundir. Fyrri lotan verður kennd í  lok október fram í miðjan desember en sú seinni í janúar til loka febrúar 2010. Unnið er að því að fá námið viðurkennt til eininga og inn í fagnám til iðnréttinda í iðnskólakerfinu.

Námið kostar um 85.000 kr. en rétt er að geta þess að í mörgum tilfellum fá starfsmenn eða fyrirtæki stóran hluta námskostnaðar endurgreiddan frá fræðslusjóðum atvinnulífsins.

Kennt verður á kvöldin, frá 17:10 – 21:50, þrjá daga í viku og fáeina laugardaga frá 9:00 – 12:50, þar sem áhersla er á verklegri kennslu. Kennarar koma m.a. frá félagi skrúðgarðyrkjumeistara og eru sérfræðingar á sviði steinlagna.

Nánari upplýsingar um námið má finna á heimasíðu Tækniskólanns www.tskoli.is og á heimasíðu Horticum menntafélags ehf. www.horticum.is einnig má senda fyrirspurnir á ave@tskoli.is og magnus@horticum.is eða hringja í síma 514 9601 og 822 0469.

Skoða kynningarbækling steinlagnatækni

27. ágúst 2009

Námskynning í Skerjafirði

Fimmtudaginn 27. ágúst s.l. var haldin námskynning vegna steinlagna- og umhirðutækni. Kynningin fór fram í húsnæði Tækniskólanns í Skerjafirði. Góð mæting var á kynninguna sem starfsmenn Tækniskólanns, Horticum menntafélags og félags skrúðgarðyrkjumeistara stóðu fyrir. Húsnæðið, sem er gamalt flugskýli, hefur verið breytt í verknámsaðstöðu og mun m.a. Múrardeild Tækniskólanns nota aðstöðuna sem hentar afar vel til slíkrar kennslu.

5. ágúst 2009

Nám í steinlagna- og umhirðutækni við Tækniskólann 

Nám í steinlagna– og umhirðutækni er mótað og uppbyggt af Félagi skrúðgarðyrkjumeistara og Horticum menntafélagi ehf. í samstarfi við Tækniskólann – skóla atvinnulífsins. Einnig hafa Starfsmenntaráð, Samtök iðnaðarins, Efling stéttarfélag, BM Vallá og Steypustöðin komið að samstarfinu og veitt styrki til verksins.

Námi í steinlagna– og umhirðutækni er ætlað að koma til móts við kröfur atvinnulífsins um þekkingu og hæfni almennra starfsmanna sem sinna gróður- og yfirborðsvinnu, jafnframt því að mæta væntingum nemenda um vandað starfsnám á þessu sviði.

Sjá nánar um námið undir Námskeið og kennsla