Golfvellir – umhirða og viðhald

Vinsældir golfíþróttarinnar hafa aukist mikið á undanförnum árum. Golfvöllum hefur einnig fjölgað mikið í samræmi við aukna eftirspurn. Aðstæður á Íslandi eru þannig að álag á völlunum er mikið, t.d. vegna rysjótts veðurfars og stutts sumars. Engu að síður hafa kröfur um lengra leiktímabil og meiri gæði golfvalla aukist með hverju árinu. Í því sambandi skiptir rétt uppbygging vallanna miklu, en rétt umhirða er ekki síður mikilvæg. Í handbók þessari er að finna upplýsingar og leiðbeiningar um öll helstu viðhalds- og umhirðuverkefni sem unnin eru á golfvöllum.

Umhirða á golfvöllum er mjög sérhæfð vegna þeirra flóknu aðstæðna sem þar er að finna. Álag á grassvæðum vegna leikmanna er mikið, en ekki síst vegna hárrar sláttutíðni og lágrar sláttuhæðar. Eigi gras að geta vaxið og þrifist vel við þessar erfiðu aðstæður, þarf að þekkja vel til verka og aðferða. Á flestum stærri völlum starfa sérmenntaðir vallarstarfsmenn sem hafa hlotið þjálfun í þeim aðgerðum sem nauðsynlegar eru. Vélar og verkfæri á golfvöllum eru einnig sérhæfð og krefjast fagkunnáttu notandans. Fram til þessa hefur skort leiðbeiningar um viðhald og umhirðu, sem skrifaðar eru með hliðsjón af íslenskum aðstæðum. Meginmarkmið með útgáfu þessarar handbókar er að bæta úr því og veita vallarstarfsmönnum leiðbeiningar um viðurkenndar aðferðir og auka þannig gæði og endingu íslenskra golfvalla.

Handbókin er unnin af sérfræðingum Línuhönnunar hf. í viðhaldi og umhirðu grasvalla, þeim Árna Bragasyni jurtaerfðafræðingi, Baldri Gunnlaugssyni garðyrkjutækni, Magnúsi Bjarklind garðyrkjutækni og Bjarna Hannessyni golfvallafræðingi. Ágúst Jensson golfvallafræðingur aðstoðaði við gerð bókarinnar, bæði við ljósmyndun á tækjum, textavinnu og faglegan yfirlestur. Einnig veitti Hólmar Freyr Christiansson golfvallafræðingur ráðgjöf varðandi vélar og tæki.

Leiðbeining um notkun bókarinnar

Handbókin er fyrst og fremst hugsuð sem stoðgagn, þar sem almennar leiðbeiningar og viðmið eru sett fram. Gert er ráð fyrir að á flestum golfvöllum sé fyrirliggjandi umhirðuáætlun sem starfað er eftir. Fremst í viðkomandi leiðbeiningu er almennur texti um verkið sem vinna skal. Fyrir neðan almenna textann eru mikilvæg atriði talin upp, gjarnan í þeirri röð sem best er að vinna verkið. Einnig eru settar fram mikilvægar upplýsingar, m.a. öryggisleiðbeiningar sem vert er að hafa í huga. Ljósmyndir og teikningar eru til nánari útskýringar og leiðbeiningar.

Nálgast má bókina á heimasíðu verkfræðistofunnar Eflu, eða hér.